Maine Aahuti Bankar Dekha (Agyeya)

Main kab kahta hoon jag meri durdhar gati ke anukool bane
Main kab kahta hoon jeevan-maru nandan-kaanan ka phool bhane
Kaanta kathor hai, theekha hai, usmein uski maryada hai
Main kab kahta hoon wah ghatkar prantar ka ochha phool bane

Main kab kahta hoon yuddha karoon to mujhe na theekhi chot mile
Main kab kahta hoon pyaar karon to mujhe praapti ki ot mile
Main kab kahta hoon vijay karon, mera uncha praasad bane
Ya patra jagat ki shraddha ki, meri dhundhli si yaad bane

Path mera rahe prashasta sada, kyon vikal kare yaha chaha mujhe
Netritva na mera chchin jaave, kyon iski ho parvaah mujhe
Main prastut hoon, chahe mitti janpad ki dhool bane
Phir us dhuli ka kan-kan bhi mera gati-rodhak shool bane

Apne jeevan ka ras dekar, jisko yatnon se paala hai,
Kya waha kewal avasaad-malin jharte aansoo ki maala hai
Ve rogi honge prem jinhe anubhav-ras ka katu-pyaala hai
Ve murde honge prem jinhe sammohan-kari haala hai

Maine vidagdha ho jaan liya, antim rahasya pehchan liya
Maine aahuti bankar dekha, yaha prem yagya ki jwala hai
Main kahta hoon main badhta hoon, main nabh ki choti chadhta hoon
Kuchla jaakar bhi dhuli-sa, aandhi-sa aur umadta hoon

Mera jeevan lalkar bane, a-saphalta hi asi-dhaar bane
Is nirmam rana mein pag-pag ka rukna hi mera vaar bane
Bhav saara tujhko hai swaha, sab kuchch tapkar angaar bane
Teri pukar sa durnivaar mera yaha neerav pyaar bane